1. Գիտակցի՛ր, որ մեղավոր ես
Որքան էլ փորձենք ճիշտ կյանքով ապրել, այնուամենայնիվ մենք շատ հեռու ենք լավ մարդ լինելուց: Պատճառն այն է, որ մենք բոլորս մեղավոր մարդիկ ենք։ Աստվածաշունչն ասում է. «Արդար չկա, մեկն էլ չկա»: Առանց Հիսուս Քրիստոսի մենք չենք կարող դառնալ այնպիսին, ինչպիսին պետք է լինենք:
2. Ընդունի՛ր, որ Հիսուս Քրիստոսը խաչի վրա մահացավ քեզ համար
Աստվածաշունչն ասում է. «Աստված Իր սերը մեր հանդեպ հայտնեց նրանով, որ երբ մենք դեռ մեղավոր էինք, Քրիստոսը մեզ համար մահացավ»: Սա է բարի լուրը. Աստված մեզ այնքան է սիրում, որ Իր Միածին Որդուն ուղարկեց` մեր փոխարեն մահանալու, երբ մենք դրան արժանի չէինք։
3. Ապաշխարի՛ր մեղքերիդ համար
Աստվածաշունչն ասում է. «Ապաշխարե՛ք ու դարձի՛ եկեք, որպեսզի ձեր մեղքերից սրբվեք»: «Ապաշխարել» նշանակում է փոխել մեր կյանքի ուղղությունը։ Աստծուց փախչելու փոխարեն մենք պետք է շրջվենք դեպի Աստված։
4. Ընդունի՛ր Հիսուս Քրիստոսին քո սրտում և կյանքում
«Քրիստոնյա դառնալ» չի նշանակում պարզապես հարել քրիստոնեական հավատքին կամ եկեղեցի հաճախել: Երբ քրիստոնյա ես դառնում, Քրիստոսն անձամբ բնակվում է քո մեջ` քո սրտում և կյանքում։ Նա ասաց. «Ահա Ես դռան առջև կանգնած եմ և թակում եմ։ Եթե մեկը լսի Իմ ձայնը և դուռը բացի, կմտնեմ նրա մոտ…»: Եթե ցանկանում ես փոխհարաբերություն ունենալ Քրիստոսի հետ, պարզապես հավատքով, սրտանց աղոթի՛ր.
«Սիրելի՛ Տեր Հիսուս, ես գիտեմ, որ մեղավոր եմ, և ապաշխարում եմ Քո առջև։ Ես հավատում եմ, որ Դու մահացար իմ մեղքերի համար։ Խնդրում եմ՝ ներիր ինձ և մաքրիր իմ մեղքերից: Ես բացում եմ Քո առջև իմ սրտի ու կյանքի դուռը և ընդունում եմ Քեզ որպես իմ Տեր ու Փրկիչ։ Շնորհակալ եմ ինձ փրկելու համար։ Ամե՛ն»:
Բարի գալո՛ւստ Աստծո ընտանիք։
Դու կայացրել ես կյանքիդ ամենակարևոր որոշումը` ընտրելով հետևել Հիսուս Քրիստոսին։ Հավանաբար քո մեջ շատ ու շատ հարցեր կառաջանան հոգևոր այս կամ այն թեմայի վերաբերյալ: Գուցե և կարիք լինի թողնելու քո հին սովորությունները՝ Հիսուս Քրիստոսի մեջ աճելու համար: Հոգևոր աճը ժամանակ է պահանջում, բայց դա սկսվում է հենց հիմա ու հենց այնտեղից, որտեղ դու ես:
Գրի՛ր մեզ Հիսուսին ընդունելու քո որոշման մասին։ Մենք ցանկանում ենք քեզ նվեր ուղարկել Նոր Կտակարան և հոգևոր ուսուցողական նյութեր, որոնք կօգնեն աճելու Հիսուս Քրիստոսի հետ փոխհարաբերություններում։
Առաջին քայլեր դեպի Աստված
Կարդա՛ Աստվածաշունչը
Աստված Իրեն բացահայտում է Իր Խոսքի միջոցով։ Կարդալով Աստվածաշունչը՝ դու կկարողանաս ավելի լավ ճանաչել Նրան և հասկանալ, թե ինչն է Նրան հաճելի։ Իսկ Աստծո Խոսքին հնազանդվելով՝ դու կզորանաս և քո կյանքում դրական փոփոխություններ կտեսնես։
Արի՛ եկեղեցի
Աստված մեզ պատվիրում է մեկտեղ հավաքվելը չթողնել (Եբրայեցիս 10․25)։ Քրիստոնյաների հետ հաղորդակցությունը կօգնի աճելու ու հոգևոր լավ «մարզավիճակում» լինելու: Եկեղեցին կառաջնորդի քեզ Աստծո Խոսքով, հնարավորություն կտա գործածելու Աստծուց տրված պարգևներն ու հմտությունները։
Սկսի՛ր ապրել Աստծո համար
Ի՞նչ է նշանակում «ապրել Աստծո համար»։ Նախևառաջ դա նշանակում է հնազանդվել Աստծուն: Երբ սկսում ես Աստվածաշունչ կարդալ, աղոթել, մաքրվում են մտքերդ, փոխվում է կյանքիդ ընթացքը, գործողություններդ, դու սկսում ես ապրել Աստծո Խոսքի համաձայն և նմանվել Հիսուս Քրիստոսին:
Պատմի՛ր Նրա մասին
Աստված մեզ պատվիրեց Ավետարանը քարոզել բոլոր մարդկանց (Մարկոս 16․15): Պատմի՛ր Հիսուսի մասին, ասա՛, որ հավատում ես Նրան, և թե ինչ է արել Նա քեզ համար: Կարիք չկա սպասելու, թե երբ կդառնաս Աստվածաշնչի «մասնագետ», որպեսզի փոխանցես փրկության լուրը։
Մի՛ մոլորվիր
Դառնալով Աստծո զավակ՝ դու դառնում ես սատանայի թշնամին, և նա կփորձի քեզ գայթակղել, որպեսզի չհնազանդվես Աստծուն։ Փորձվելը մեղք չէ, սատանան փորձեց գայթակղել նույնիսկ Հիսուսին (Ղուկաս 4.1-3), բայց գայթակղությանը տրվելը մեղք է: Քրիստոնյաների կյանքում երբեմն լինում են դժվարություններ, փորձություններ, սակայն Աստված խոստացել է միշտ լինել մեզ հետ և զորացնել մեզ դժվարությունների մեջ: